John 21
Yesus aqa aŋgro 7-pela naŋgi na a uneb
1Onaqa bati bei Yesus a Galili ya agu qalaq dia sosiqa olo aqa aŋgro naŋgoq di brantej. Ya agu di aqa ñam bei Taiberias. Yesus a aqa aŋgro naŋgoq di olo brantej deqa e kiñala saqai. 2Ya agu qalaq dia Yesus aqa aŋgro 7-pela naŋgi soqneb. Aŋgro bei Saimon Pita. Bei Tomas aqa ñam bei Didimus. Bei Nataniel. Nataniel aqa qure utru Kana. Kana a Galili sawaq di unu. Sebedi aqa ŋiri aiyel naŋgi dego ya agu qalaq di soqneb. Ariya Yesus aqa aŋgro aiyel dego naŋgi koba na soqneb. 3Onaqa Saimon Pita a na naŋgi minjrej, “E qe oqajqa deqa kakaŋ waiyqa aieqnum.” Onaqa naŋgi na minjeb, “Iga koba na aiqom.” Degsi minjsib naŋgi koba na aisib qobuŋ gogetosib kakaŋ waiyoqneb. Di qolo. Waiyeqnab nebeej. Naŋgi qe bei osai bolesai.4Ariya nobqolo ambru naŋgi qobuŋ miligiq di sosib ŋam ateb Yesus a alile di tigelesonaq uneb. Ariya naŋgi qaliesai, di Yesus. 5Onaqa a na nenemnjrej, “O ijo aŋgro, niŋgi qe onub e?” Onaqa naŋgi na minjeb, “Eo. Iga qe osai.” 6Onaqa minjrej, “Niŋgi qobuŋ aqa qala bei baŋ woq di kakaŋ waiysib qe oqab.” Onaqa naŋgi Yesus aqa anjam di dauryosib baŋ woq di kakaŋ waiyeb qe tulaŋ ani eb. Qe di tulaŋ gulube deqa naŋgi na soqtosib qobuŋ goge di atqa keresaiinjrej.
7Onaqa Yesus aqa aŋgro bei agi Yesus a tulaŋ qalaqalaiyoqnej qaji a na Pita minjej, “Tamo di gago Tamo Koba Yesus.” Onaqa Saimon Pita a anjam di qusiqa aqa gara jugo wauqa osiq piqtej qaji di olo jigsiq qobuŋ dena prugosiq yaq aisiq Yesus aqa areq gilej. 8Onaqa Yesus aqa aŋgro naŋgi qobuŋ na beb. Naŋgi alile jojom 100 mita dego. Deqa kakaŋ qe na maqesonaq naŋgi bosib qobuŋ na titosib aisib alile di tiryeb.
9Alile di tiryosib ŋam ateb Yesus a nami ŋam tuŋguyosiq qe koitonaq ŋamyuoq di sonaq uneb. Bem qudei dego sonaq uneb. 10Onaqa Yesus na minjrej, “Niŋgi qe onub di qudei osi boiye.” 11Onaqa Pita a olo qobuŋ gogetosiqa kakaŋ qe ti titosiq alile di atej. Qe di kokba. Qe kalil sisiyeb 153. Di qe gargekoba. Ariya kakaŋ yala braŋosai.
12Onaqa Yesus a na qe qudei osiqa koitej. Osiqa naŋgi minjrej, “Niŋgi bosib qe ti bem ti endi uyiye.” Ariya naŋgi ulaosib deqa aŋgro bei na yala nenemyosai, “Ni tamo yai?” Degosai. Naŋgi qalie, di Tamo Koba Yesus. 13Onaqa Yesus a ŋamyuo jojomyosiqa bem ti qe ti di osiq naŋgi anainjronaq uyeb.
14Yesus a nami subq na tigelosiqa aqa aŋgro naŋgoq di brantoaiyeltej. Bini qalubqo.
Yesus na Pita minjej, “Ni na ijo kaja du du naŋgi gereinjroqnime”
15Naŋgi iŋgi uynab menetnjrnaqa Yesus na Saimon Pita nenemyej, “O Saimon, Jon aqa ŋiri, ni ijo aŋgro kalil buŋnjrsimqa ni segi e tulaŋ qalaqalaibeqnum e?” Onaqa Pita na minjej, “Od, Tamo Koba, ni qalieonum, e ni qalaqalaimeqnum.” Onaqa Yesus na minjej, “Deqa ni na ijo kaja du du naŋgi geregereinjroqnime.”16Osiqa olo Pita nenemyej, “O Saimon, Jon aqa ŋiri, ni e qalaqalaibeqnum e?” Onaqa Pita na minjej, “Od, Tamo Koba, ni qalieonum, e ni qalaqalaimeqnum.” Onaqa Yesus na minjej, “Deqa ni na ijo kaja naŋgi taqatnjroqnime.”
17Osiqa olo nenemyoqalubtej, “O Saimon, Jon aqa ŋiri, ni e qalaqalaibeqnum e?” Yesus na Pita anjam di nenemyoqalubtej deqa Pita a are gulubeiyonaq minjej, “O Tamo Koba, ni iŋgi iŋgi kalil qa qalie. Deqa ni qalieonum, e ni qalaqalaimeqnum.” Onaqa Yesus na olo minjej, “Deqa ni na ijo kaja naŋgi geregereinjroqnime.
18“O Pita, ni que. E bole mermqai. Ni aŋgro wala sosimqa bati deqa ni ino segi areqalo dauryosim sawa ni gilqajqa maroqnem ni deq giloqnem. Ariya bunuqna ni qeliosimqa ino baŋ soqtim tamo bei na ni tontmosim sawa ni gilqajqa uratqam qaji deq osi gilqas.” 19Pita aqa moiqajqa gam di Yesus na ubtetqa osiqa deqa degsi minjej. Pita a gam kie na moisim dena Qotei aqa ñam soqtqas di Pita a qalieqajqa deqa Yesus na degsi minjej. Osiqa Pita minjej, “Ni e daurbe.”
Yesus aqa aŋgro bei a tulaŋ qalaqalaiyoqnej qaji deqa anjam marej
20Osiqa Pita ombla walweloqnsibqa Pita a bulosiqa aŋgro Yesus na a tulaŋ qalaqalaiyoqnej qaji a naŋgi aiyel daurnjreqnaq unej. Aŋgro di agi nami Yesus aqa aŋgro naŋgi ti awoosib iŋgi uyoqnsibqa a Yesus beteryosiq nenemyej, “O Tamo Koba, aŋgro yai na ni osim jeu tamo naŋgo baŋq di atqas?” 21Pita a aŋgro di unsiqa Yesus nenemyej, “O Tamo Koba, bunuqna ino aŋgro di a kumbra kie na moiqas?” 22Onaqa Yesus na Pita minjej, “Aŋgro di a moiosaisoqnimqa e olo bqai degsi minjitqa ni deqa are koba qalaim. Di ino wau sai. Di ijo wau. Ni e daurbe.” 23Yesus a na Pita degsi minjej. Deqa Yesus aqa aŋgro di a moiqasai anjam di sawa sawaq gileqnaqa Kristen was qu kalil naŋgi quoqneb. Aŋgro di a moiqasai Yesus na Pita degsi minjosai. A na minjej, “Aŋgro di a moiosaisoqnimqa e olo bqai degsi minjitqa ni deqa are koba qalaim.”24Aŋgro di agi e segi. E Jon. E na anjam endi neŋgreŋyonum. E ijo segi ŋamdamu na Yesus aqa kumbra kalil endi unsim deqa agi neŋgreŋyonum. Iga qalieonum, ijo anjam endi bole.
25Yesus a mandamq endia sosiqa a kumbra tulaŋ gargekoba yoqnej. Deqa e are qalonum, Yesus aqa kumbra kalil deqa saosim neŋgreŋyqom di buk tulaŋ tumbol kobaosim sawa sawa kalilq dia maqosim sawa atqa keresaiqas.
Copyright information for
BOJ